శ‌శిక‌ళపై తిరుగుబాటు

panneerselvam

త‌మిళ‌నాట రాజ‌కీయాలు వేడెక్కాయి. అమ్మ స‌మాధి వ‌ద్ద 40 నిమిషాల మౌన‌దీక్ష‌తో క‌ల‌క‌లం రేపిన ప‌న్నీర్ సెల్వం ఆ త‌రువాత శ‌శిక‌ళ మీద సంచ‌ల‌న ఆరోప‌ణలు చేశారు. ‘అమ్మ’ సూచన మేరకు ముఖ్యమంత్రి పగ్గాలు చేపట్టిన తనను శశికళ, ఆమె వర్గం వారు నానా రకాలుగా అవమానించారని. ముఖ్య‌మంత్రి అయిన తాను పార్టీ ప్రతిష్ఠను కాపాడుకునేందుకు ప్రయత్నించానని, అయితే తన ప్రయత్నాలకు అడుగడుగునా అడ్డుతగిలారని, ప్రతిసారి తన స్థాయిని తగ్గించాలని చూశారని అన్నారు.

ఆదివారం తనను పోయెస్‌గార్డెన్‌కు పిలిచారని, అప్పటికే అక్కడ పార్టీ సీనియర్ నేతలు, ఎమ్మెల్యేలు, మంత్రులు, శశికళ కుటుంబ సభ్యులు ఉన్నారని వివరించారు. అక్కడికెళ్లిన తనతో ముఖ్యమంత్రి పదవికి రాజీనామా చేయమని శశికళ డిమాండ్ చేశారన్నారు. శశికళ వ్యాఖ్యలతో హతాశుడినైన తాను తనకు తెలియకుండా సమావేశం ఎందుకు నిర్వహించారని ప్రశ్నించానని నిలదీశానన్నారు. పార్టీ ప్రధాన కార్యదర్శిగా, ముఖ్యమంత్రిగా ఒకరే ఉండాలని, కాబట్టి ఆమెను శాసనసభా పక్ష నేతగా ఎన్నుకున్నామని ఎమ్మెల్యేలు చెప్పడంతో దిగ్భ్రాంతికి గురయ్యానని పన్నీర్ చెప్పుకొచ్చారు.

వారితో రెండు గంటలపాటు వాదించినా ఫలితం లేకుండా పోయిందన్నారు. శాసనసభా పక్ష నేతగా ఎన్నికైన తనతో రాజీనామా చేయించడం సబబేనా అని ప్రశ్నించానని తెలిపారు. అయితే పార్టీ క్రమశిక్షణ కోసం అవమానాన్ని భరించాల్సి వచ్చిందని పేర్కొన్నారు. జయ సమాధి వద్దకు వెళ్తానన్నా అనుమతించలేదన్నారు. తమిళనాడుకు తాను కాకపోయినా రాష్ట్రాన్ని, ప్రజలను కాపాడే వ్యక్తే ముఖ్యమంత్రి కావాలని కోరుకుంటున్నట్టు చెప్పారు. అందుకోసం ఒంటరిగానైనా చివరి వరకు పోరాడేందుకు సిద్ధమని పన్నీర్ సెల్వం ప్రకటించారు.

‘నా అంతరాత్మ వేదనతో రగిలిపోతోంది’ అన్న‌ పన్నీర్ సెల్వం దేశ ప్రజలు, పార్టీ కార్యకర్తలకు కొన్ని విషయాలు చెప్పాలనుకుంటున్నట్టు పేర్కొన్నారు. తనకు జరగకూడనిది ఏదైనా జరిగితే ముఖ్యమంత్రిగా పదవీ బాధ్యతలు స్వీకరించాలని ‘అమ్మ’ తన చేతులు పట్టుకుని మరీ చెప్పారని తెలిపారు. అలాగే పార్టీ ప్రధాన కార్యదర్శిగా ప్రిసీడియం చైర్మన్ మధుసూదన్‌ను ఎన్నుకోవాలన్నారు. అయితే ఇప్పటికే రెండుసార్లు సీఎంగా ఉండడంతో తాను నిరాకరించానని, ప్రజలు, కార్యకర్తలు కోరుకునే వారినే ముఖ్యమంత్రిని చేయాలని సూచించానని వివరించారు. త‌న మీద తనపై తిరుగుబాటు జెండా ఎగరేసిన పన్నీర్‌ను శ‌శిక‌ళ‌ పార్టీ కోశాధికారి పదవి నుంచి తొలగించారు. ఆయన స్థానంలో దిండిగల్ శ్రీనివాసన్‌ను నియమించారు.

panneerselvam1

NO COMMENTS

Leave a Reply